Isto já fede
A informaçom mais destacada d’A Nosa Terra no seu número da semana passada (nº 1169) é uma (publi)reportagem dedicada ao milagre económico da empresa galega FADESA, uma das grandes do sector imobiliário. O semanário dito nacionalista e de esquerdas esforça-se em apresentar o fundador da empresa, Manuel Jove, como um self-made-man enxebre, que ainda nom esqueceu a gúbia de carpinteiro apesar de ter entrado no Gotha dos mais ricos do mundo.
A Nosa Terra esquece que o milagre de FADESA está directamente baseado nas práticas especulativas, na segregaçom social e na deterioraçom da qualidade de vida das pessoas. No nosso país, o preço astronómico da vivenda anula os moderados incrementos salariais. As hipotecas amortizáveis em trinta anos aparecem como uma pura quimera quando a temporalidade na contrataçom se converteu em norma. E o aluguer tampouco parece uma boa alternativa, dado que as rendas aumentaram cerca de um 150% desde 1989. Quem decide comprar tem de fazê-lo longe do centro das cidades, com os conseguintes problemas de transporte, caos circulatório e poluiçom. E os “modélicos” condomínios residenciais de chalés geminados das periferias de Santiago, Crunha, Vigo ou Ferrol conduzem a uma homogeneidade social no seu interior baseada exclusivamente no parámetro do nível de renda exigível para aceder a eles. Mas nada disto parece importar ao hebdomadário. Será que, como dizia Castelao, “A Nossa Terra nom é nossa, rapazes”?
Concordo plenamente.
Semella que ese ‘nacionalismo de esquerdas’ se foi revelando coma un estúpido ‘chauvinismo da merda’. Para iso xa están os redactores da LaVoz.
É outro síntoma da deriva do ‘establishment nacionalista’?
Comment by dot — April 9, 2005 @ 7:19 am
Alucino. Os que procedemos desas periferias susceptíbeis de especulación xa levamos moitos anos sufrindo a agresiva política expansiva desa empresa, e os fortes efectos segregadores e discriminatorios que supón o enorme encarecemento da vivenda tras a chegada das súas promocións inmobiliarias, apoiadas sempre en untos variados e substanciosos nos gobernos locais. E é que os periurbanos xa hai tempo que estamos desenganados, queridos: a nosa terra claramente non é nosa, é de FADESA.
Comment by Plattdorf — April 9, 2005 @ 10:22 am
Glups, perdón polo HTML desastroso… Falaba eu de “untos variados e substanciosos nos gobernos locais”.
Comment by Plattdorf — April 9, 2005 @ 10:32 am